✍️ संपादकीय— दबंगनामा एक्सप्रेस.
जनतेच्या कररुपी पैश्यावर नेत्यांचा गवगवा का? आम्हीच विकास केला म्हणणारे जनतेला हिशेब दाखवणार का?
जव्हार : विकासाचा गवगवा की भ्रष्टाचाराचा तमाशा?
सरकार कोणत्याही पक्षाचे असो त्यांच्या चांगल्या कामांना समर्थन आहेच परंतु जया ठिकाणी सरकार चुकत असेल तिथे विरोध करणे सुध्दा गरजेचे आहे. जव्हार नगरपरिषदेच्या निवडणुकीचा रणसंग्राम सुरु झाला आहे, या पार्श्वभूमीवर शहरात आमचाच पक्ष जनसेवेसाठी श्रेष्ठ कसा हे दाखवून देण्यासाठी रंगारंग स्पर्धा रंगलेली दिसत आहे.यासाठीच काही दिवसांपूर्वी समस्त शहरात इच्छुक उमेदवारांचा आणि सर्वपक्षीय “विकासाच्या बॅनरांचा पूर” आलेला होता, आणि असाच बेनरबाजीचा महापुर काही दिवसांनी पुन्हा उदयास येईल. मागील सुमारे आठ वर्षे जव्हारकरांच्या नशीबी बोगस कामे अन्वये बेसुमार भ्रष्टाचार,मरणादायी खड्डेमय रस्ते , गटारं उघडी, पाणीपुरवठा खंडित, कचऱ्याच्या दुर्गंधिने आरोग्याचा बोजवारा उडत होता, आणि अकर्तव्यदक्ष नेते मंडळीच्या उपकारासमोर जव्हारकर निमूटपणे हा सर्व त्रास सहन ही करीत होते. त्यावेळेस गायब राहणारे काही बड़बोले नेते आता आम्हीच निधी आणला, आम्हीच कसा विकास केला” असा गवगवा करत फिरत असल्याने जव्हारकारांच्या वतीने तीव्र संताप व्यक्त होत आहे. कारण जव्हारच्या जनतेचा प्रश्न स्पष्ट आहे की “हा निधी तुमच्या मालकीचा नव्हे, आमच्या कररूपी पैशाचा आहे! म्हणजेच आमच्याच मालकीचा आहे मग कृपा दाखवता कशाला?” आणिआम्हीच विकास केला म्हणणारे बड़बोले नेते जनतेला हिशेब दाखवणार का? असे संतप्त सवाल देखील जव्हारकारांच्या मनात उमटत आहेत.
निधी आमचा – नाव तुमचं : भ्रष्टाचाराचं सूत्र!
जव्हार नगरपरिषदेतील ठेकेदारीचा राक्षस पुन्हा डोईजड झाला होता. कामं कागदावर पूर्ण दाखवली, पण प्रत्यक्षात अपूर्ण राहिली. रस्ते अजूनही
खड्ड्यांनी भरलेले, गटारं ओसंडलेली, आणि अजूनही अपूर्ण असलेल्या खड़खड़ पाणी योजनेच्या नळांतून पाण्याऐवजी भ्रष्टाचार वाहून येत आहे, अश्या भ्रष्टाचारी योजनेतून विकास फ़क़त नेत्यांचा आणि विनाश हा जनतेचाच झाल्याचे दिसून येत आहे, म्हणूनच हा निधी उपकार नव्हे, तर तो जनतेचा हक्क आहे. पण बॅनरवर फोटो टाकून हे नेते स्वतःचं नाव उजळवण्यात व्यस्त आहेत.
मतदारांनो, या वेळी डोळे उघडे ठेवा!
जव्हारकरांनो, निवडणुकीत पुन्हा एकदा “नोटा, बाटल्या, वचने” यांचा खेळ सुरू होणार.
म्हणून या वेळी विचारपूर्वक मत द्या —
• उमेदवार शिकलेला आहे का?
• त्याला शहराच्या विकासाची दूरदृष्टी आहे का?
• तो जात, धर्म किंवा पक्षपातीपणा न करता काम करेल का?
• नगरपरिषदेत तो ठेकेदारीतून आपली पोळी भाजणारा नाही ना?
• आणि तो अधिकारी-कर्मचाऱ्यांना ठणकावून सांगेल का की — “तुम्ही जनतेचे नोकर आहात, आमचे नव्हे!”
विकास फक्त पोस्टरवर; वास्तवात शहर अंधारात!
गेल्या सुमारे आठ वर्षांत शहरात झालेल्या विकासाची स्थिती अत्यंत दयनीय आहे.रस्त्यांवर चिखल, गटारांमधून दुर्गंधी, आणि पाणीपुरवठा योजनांचा फसलेला खेळ. अधिकारी आणि राजकारणी यांच्या मिलीभगतीने बिलं फुगवली गेली, पण कामं बुडवली गेल्याच्या चर्चा ही जव्हार शहरात रंगल्या आहेत.
जनतेचा संताप उफाळणार !
याविरोधात जव्हारकर थेट संताप व्यक्त करीत आहेत की “हे नेते आमच्या पैशाचा निधी आणून उपकार दाखवतात! गेल्या आठ वर्षांत काहीच केलं नाही, आणि आता बॅनरवर सोशल मिडियावर व्यक्त होत आहेत! पण या वेळेस आम्ही फसणार नाही, मत विकू नाही, कारण मत विकलं म्हणजे शहर विकलं!”
आणखी एक जव्हारकर म्हणतो की “रस्ते खड्ड्यांनी भरले, गटारं उघडी, योजना अपूर्ण, ठेकेदार मस्त आणि जनता त्रस्त आणि ते निधी आणल्याचं सांगतात! निधी जनतेचा होता, काम मात्र अडकलं! आता आम्ही बॅनरवर नाही — कामावर मत देऊ!”
खरा भूकंप कोणी राजकारणी नव्हे – दक्ष जनता घडवणार !
या निवडणुकीत खरा भूकंप कोणी राजकीय नेते नव्हे, तर जागृत आणि दक्ष जव्हारची जनता घडवणार आहे.
कारण जनता आता ठरवून बसली आहे मत द्यायचं तर सुशिक्षित, दूरदृष्टी असलेल्या, खऱ्या विकासाभिमुख उमेदवारालाच! खोटा प्रचार करणाऱ्या चेले-चपाट्यांना आता समजलं पाहिजे की,जनता जेव्हा जागी होते, तेव्हा खोटा विकास कोसळतो आणि सत्याचा भूकंप होतो!
दबंगनामा एक्सप्रेसचा ठाम सवाल !
जव्हारमध्ये काही राजकारणी, अधिकारी आणि ठेकेदारांनी मिळून विकासाचा गळा घोटला आहे. आता जनता मतदान पेटीतूनच या भ्रष्ट व्यावस्थेला उत्तर देणार आहे.“जो भ्रष्टाचार करतो — तो शहर विकतो,आणि जो मत विकतो — तो भविष्य अंधारात ढकलतो!”
जनतेसाठी दबंगनामा एक्सप्रेसचं आवाहन
जव्हारकरांनो, ही निवडणूक “सत्तेच्या खुर्चीसाठी” नाही तर शहराच्या सन्मानासाठी आहे! ज्यांनी निधीवर आपली छबी लावली, काम बुडवलं आणि जनतेला फसवलं, त्यांना या वेळेस दबंग मतदानाने धडा शिकवा!
